လွတ်လပ်ရေးဖခင် ဗိုလ်ချုပ်အောင်ဆန်း တည်ထောင်ခဲ့သော ဗမာ့တပ်မတော်သည် တိုင်းရင်းသားပြည်သူတို့၏ အားကိုးယုံကြည်မူကိုအပြည့်အ၀ရရှိခဲ့ပြီး သမိုင်းအစဉ်အလာ တင့်တယ်စွာဖြင့် ဂုဏ်သိက္ခာကြီးမားသောတပ်မတော်တရပ်ဖြစ်ခဲ့သည်။ သို့သော်စစ်အာဏာ ရှင်အဆက်ဆက်၏လက်အောက်တွင် ထိုတပ်မတော်သည် အပြစ်မဲ့တိုင်းရင်းသားပြည်သူများ၊ ကျောင်းသားလူငယ်များနှင့် ရဟန်းသံဃာများကို သတ်ဖြတ်ချေမှုန်းခြင်းများ ကျူးလွန်ခဲ့သည်။ လက်တဆုပ်စာစစ်အာဏာရှင်တို့သည် တိုင်းရင်းသားပြည်သူလူထု၏ မြေယာအိုးအိမ်စည်းစိမ် တို့ကိုသိမ်းယူကြပြီး နိုင်ငံ၏ဘဏ္ဍာကိုကိုယ်ကျိုအတွက်အသုံးချကာ မြန်မာပြည်တရပ်လုံးကို အဆင်းရဲဆုံးတိုင်းပြည်အဖြစ် တွန်းပို့ခဲ့ပါသည်။တပ်မတော်၏ဂုဏ်သိက္ခာလည်းအဆုံးစွန်ထိ ကျဆုံးကင်းမဲ့ခဲ့ရပါသည်။
၂၀၀၉ ခုနှစ်နှောင်းပိုင်းနှင့် ၂၀၁၀ နှစ်ဦးပိုင်းတွင် တပ်တွင်းအာဏာဖီဆန်မှု၊ သဘောထားကွဲလွဲမှုများ ဆက်တိုက်ပေါ်လာပြီး၊ တပ်မ (၇၇) နှင့် (၆၆) လက်အောက်ခံ တပ်ရင်းများ၏အခြေနေမှန်ကို ဖော်ထုတ်ခဲ့ကြသည်။ ထိုဖြစ်ရပ်များသည် တပ်တွင်းတွင် အမှန်တကယ် ကြုံတွေ့နေရသော စားဝတ်နေရေး ဒုက္ခအခက်အခဲပြဿနာများဖြစ်ပြီုး ပြည်သူလူထုတို့၏အခက်အခဲအကျပ်အတည်းကို တပ်မတော်ကိုယ်စားပြု၍ ဖော်ပြလိုက်ခြင်း ပင်ဖြစ်သည်။အောက်ခြေတပ်များ၏ ဒုက္ခအခက်အခဲများကို နည်းမှန်လမ်းမှန်ဖြေရှင်းရန် နအဖ စစ်အုပ်စုတွင် အစီအမံအတိအကျမရှိပဲ အမိန့်အာဏာဖြင့်ထိန်းချုပ်ဖိနှိပ်ထားသည်ကို တွေ့မြင် နေရပါသည်။ တိုင်းပြည်၏ဲအကျပ်အတည်း ရိုက်ခတ်မှုများကြောင့် ယနေ့ကာလတွင်တပ်တွင်း သဘောထားကွဲလွဲမှုများ၊ အမိန့်အာဏာဖီဆန်မှုများ ဆက်တိုက်ဆိုသလို ပေါ်ထွက်လာခြင်း ဖြစ်သည်ဟု မိမိတို့ မဒတ တပ်ပေါင်းစုမှရှုမြင်သုံးသပ်မိပါသည်။
နအဖ စစ်အုပ်စုသည် အခြေခံပြည်သူလူထုတို့၏ အခက်အခဲအကျပ်အတည်းများကို ဖြေရှင်းပေးရန်မရှိသည့်အပြင် နိုင်ငံတော်၏သယံဇာတ၀င်ငွေများကိုလည်း ကိုယ်ကျိုးအလွဲသုံး စားအသုံးပြုခြင်း၊ တိုင်းရင်းသားပြည်သူများကိုနှိပ်စက်ရန် စစ်အင်အားပြင်ဆင်ခြင်းတို့သာ ပြုလုပ်လျှက်ရှိသည်။ ၂၀၁၀ ရွေးကောက်ပွဲကျင်းပပြီး ရုပ်သေးအရပ်သားအစိုးရထံ အာဏာလွှဲ ပေးရန်ပြင်ဆင်ခြင်း၊ စစ်ခေါင်းဆောင်အချို့ကို ရာထူးတိုးမြှင့်ပြေင်းရွှေ့ခြင်း၊ နောက်ဆက်တွဲ ငွေကြေးဖောင်းပွမှုဖြစ်စေမည့် ၀န်ထမ်းလစာတိုးပေးခြင်း၊ အစရှိသည့်ဆေးမြီးတိုတို့မှာ အခြေခံ ပြည်သူလူထုအပါအ၀င် ရဲဘော်တပ်သားများ လက်ငင်းရင်ဆိုင်နေကြရသော စားဝတ်နေရေး အကြပ်အတည်းကို မည်သို့မျှဖြေရှင်းပေးနိုင်မည်မဟုတ်ပေ။
တိုင်းရင်းသားမြန်မာပြည်သူလူထုတရပ်လုံးရင်ဆိုင်ကြုံတွေ့နေရသောအကျပ်အတည်းများကို ရင်ဆိုင်ကျော်လွှားနိုင်မည့် အကောင်းဆုံးနည်းလမ်းမှာ တိုင်းချစ်ပြည်ချစ်တပ်မတော် သားများပြည်သူလူထုဘက် ပြတ်ပြတ်သားသားရပ်တည်ကာ ပြည်သူလူထုနှင့်အတူ ပြဿနာ များကိုဝိုင်းဝန်းဖြေရှင်းခြင်းပင်ဖြစ်သည်။
ထို့ကြောင့်ယနေ့ယဉ်ဆိုင်နေရသော တိုင်းပြည်၏ပြဿနာအရပ်ရပ်တို့ကို အတူတကွ ငြိမ်းချမ်းစွာဖြေရှင်းရန်အတွက် တိုင်းချစ်ပြည်ချစ်တပ်မတော်သားများ ပြည်သူလူထုဘက် ရဲရဲဝံ့ဝံ့ရပ်တည်ရန်နှင့် မိဘပြည်သူတို့၏ရင်ခွင်သို့ပြည်လည် ခိုလှုံဝင်ရောက်လာမည်။ တိုင်းချစ် ပြည်ချစ်ဗမာ့တပ်မတော်သားကောင်းများ၏ မှန်ကန်သောလုပ်ရပ်ကို အစဉ်ထောက်ခံကြောင်း အမျိုးသားဒီမိုကရေစီတပ်ပေါင်းစု - မဒတ အနေဖြင့် အလေးအနက်တိုက်တွန်းပန်ကြား လိုက်ပါသည်။
“ တပ်ပေါင်းစုဖြင့် အောင်ပွဲခံရမည်”
ဗဟိုအလုပ်မှုဆောင်ကော်မီတီ
အမျိုးသားဒီမိုကရေစီတပ်ပေါင်းစု- မဒတ
ရက်စွဲ ။ ။ ၁၆ ရက် ဇန်န၀ါရီ ၂၀၁၀ ခုနှစ်။
No comments:
Post a Comment